Словенија официјално ги усвои измените на Законот за возачи со кои им се овозможува на сопствениците на македонски возачки дозволи да ги заменат своите документи без да го полагаат практичниот дел од возачкиот испит. Одлуката, донесена вчера, претставува значајно олеснување за македонските државјани кои веќе живеат или планираат да живеат и работат во Словенија.
Според новите правила, носителите на возачки дозволи издадени во Македонија, но и во Босна и Херцеговина, Србија, Црна Гора и Косово, ќе имаат рок од една година по пријавувањето на престојот во Словенија да го заменат документот. Најважната новина е што тие нема да мораат да полагаат практичен испит, што досега претставуваше голем административен и финансиски товар за странските работници.
Иако практичниот дел е укинат, сепак останува обврската за доставување лекарска потврда за ментална и физичка способност за управување моторно возило. Словенечките власти истакнуваат дека ова е неопходно за да се задржат стандардите за безбедност во сообраќајот.
Сандра Газинковски од партијата „Слобода“, која беше дел од предлагачкиот тим за измените, објасни дека оваа промена не претставува привилегија, туку логично олеснување за работниците.
„Ова беше административна пречка која неоправдано ги забавуваше процедурите за вработување и им создаваше дополнителни трошоци, чекања и повторни тестирања на луѓето“, изјави Газинковски. Таа додаде дека мерката ќе го олесни секојдневието на илјадници странски работници и ќе ја забрза нивната интеграција на пазарот на труд.
Одлуката е поздравена од македонската дијаспора и агенциите за вработување кои работат со регионални работници, бидејќи практичниот испит во Словенија е скап, долготраен и често потешко достапен за нови мигранти. Многумина досега мораа повторно да посетуваат часови за возење, да полагаат практични тестови или да ангажираат преведувачи, што значително ја зголемуваше цената и времетраењето на процесот.
Но не сите партии во Словенија се согласија со донесените измени. Опозицијата беше против законот, наведувајќи дека укинувањето на практичниот дел може да влијае на безбедноста во сообраќајот. Според нив, стандардите на обука и возачки испити во различни држави се разликуваат, поради што „нивното автоматско признавање не секогаш гарантира усогласеност со националните критериуми“.
И покрај критиките, измените поминаа во Собранието, а законот ќе започне да важи веднаш по објавувањето. За македонските граѓани во Словенија тоа значи дека ќе можат побрзо да ги регулираат административните обврски и да се интегрираат во системот без непотребни бариери.
Новата мерка се вклопува во пошироките европски тенденции за олеснување на мобилноста на работната сила и меѓусебното признавање на документи. Во исто време, таа е важен сигнал за сè поголемата бројност на работници од Западен Балкан во земјите на ЕУ, кои се соочуваат со недостиг на работна сила и бараат поедноставени системи за вработување.
