Осми март е пред врата, а цвеќето е еден од најчестите и најубавите подароци, без разлика дали го подаруваме или добиваме. Сепак, малкумина знаат дека секој цвет носи посебна симболика и испраќа порака до личноста на која ѝ се подарува.
Розите, на пример, имаат различно значење во зависност од нивната боја. Црвените се симбол на страст и љубов, додека белите претставуваат невиност, искреност и чистота. Жолтите можат да означуваат радост, но според традиционалните верувања, тие понекогаш се поврзуваат и со љубомора и неверство. Портокаловите симболизираат желба и опчинетост, додека лилјаковите, како и розите без трње, асоцираат на љубов на прв поглед. Темнолилавите се знак на желба за уникатност и издвојување, а сините, поради вештачкиот начин на нивно добивање, симболизираат нешто невозможно.
Каранфилите исто така имаат различни значења. Виолетовите претставуваат каприциозност и се совршен подарок за личност со авантуристички дух. Розовите се симбол на благодарност, додека белите се идеални за испраќање добри желби.
Орхидеите, пак, се поврзуваат со почит, единство и плодност. Белите орхидеи најчесто симболизираат нови почетоци, што ги прави одличен избор за некој што започнува ново животно поглавје.
Мимозата е позната како знак на сигурност и самодоверба, а нејзините златножолти цветови дополнително ја симболизираат раскошот и моќта. Освен тоа, мимозата често се поврзува и со љубезноста.
Лалињата, пак, носат силни емоционални пораки. Црвените се поврзуваат со вистинската љубов, жолтите изразуваат ведрина и радост, додека белите се симбол на простување.
Лилјаните традиционално се поврзуваат со женственоста и плодноста. Во христијанската традиција тие претставуваат чистота, невиност и повторно раѓање. Розовите лилјани изразуваат наклонетост, восхит и чиста љубов, додека белите се знак на сочувство.
Божурите носат порака на среќа и добра волја, а во Кина и Јапонија тие се симбол на богатство, чест и раскош.
Од друга страна, сончогледите ја претставуваат силата, гордоста, восхитот и обожувањето. Доколку ги подарите на сакана личност, тоа значи дека таа е центарот на вашиот свет.
Секој цвет има своја приказна и значење, а со внимателен избор можете да испратите моќна порака без ниту еден збор.
