Американскиот министер за финансии Скот Бесент се огласи на Светски економски форум во Давос, каде што ги повика европските земји да не реагираат импулсивно на најавите на американскиот претседател Доналд Трамп за можни царини.
„Она што го повикувам сите да го направат е да седнат, да земат длабок здив и да ги остават работите да се одвиваат“, изјави Бесент на прес-конференција. Според него, „најлошото нешто што државите можат да го направат е да ескалираат конфликт со Соединетите Американски Држави“.
Тој како пример ја наведе Кина, која, според неговите зборови, во минатото ескалирала трговски спор со САД, што резултирало со „несреќно меѓусебно надметнување“.
Бесент додаде дека заканите на Трамп поврзани со Гренланд се „многу поразлични“ од класичните трговски договори и ги повика земјите да се придржуваат до постојните меѓународни спогодби. „Тие се договорени и обезбедуваат голема сигурност“, истакна тој.
„Членството на САД во НАТО не е под знак прашалник“
Одговарајќи на прашање дали САД и понатаму се сигурен сојузник на Европа, Бесент ги обвини медиумите дека заземаат „максималистички позиции“.
„Секако дека Европа е сојузник. Членството на САД во НАТО не е доведено во прашање. Партнери сме во напорите да се запре трагичната војна меѓу Русија и Украина, но тоа не значи дека не можеме да имаме несогласувања околу иднината на Гренланд“, изјави американскиот министер.
