Министерот за енергетика и министерот за екологија на Македонија потпишаа писмо за намери со словенечката приватна компанија Avant car за поддршка на првиот систем за заедничко користење или краткорочно изнајмување електрични возила, како дел од јавниот превоз во Скопје.
Со помош на мобилна апликација, возачот – претплатник на оваа услуга – ќе може да најде достапно електрично возило. Изнајмувањето ќе се плаќа дигитално или со платежна картичка според времетраењето на користење и изминатата километража.
Според најавите, првата, пробна фаза ќе започне во февруари, додека комплетната услуга ќе биде достапна за корисниците од март. Ценовникот за оваа услуга ќе биде објавен во февруари, а според изјавите на сопственикот на Avant car, Матеј Чер, изнајмувањето ќе биде поевтино од такси. Пример, возење од центарот на Скопје до аеродромот ќе чини од 10 до 15 евра.
Министерот за енергетика истакна дека полначите за батериите на електричните возила ќе се напојуваат исклучиво со електрична енергија од обновливи извори.
Министерката за екологија изјави дека Avant car веќе го докажа трансформативниот потенцијал на своите проекти во Љубљана, Дубровник, Загреб и Виена, каде што овој систем за споделување електрични возила ги намали сообраќајните гужви и го подобри квалитетот на воздухот. Истото се очекува и во Скопје.
Компанијата Avant car работи повеќе од 20 години во Словенија, Хрватска и Австрија и располага со повеќе од 10.000 електрични возила. Проектот за „кар-шеринг“ започна во 2016 година во Љубљана и сега е интегриран дел од јавниот превоз.
