Настанот започна во 20 часот со Марк Рибо – познат по својот авангардeн пристап кон џезот, рокот и експерименталната музика.
Со својот единствен звук, кој истовремено содржи и сурова емоција и интелектуална длабочина, Рибо ја маѓепса публиката со соло изведба што преминуваше од интимни тивки акорди до експлозивни импровизации.
Во 22 часот, сцената ја презеде Kahil El’Zabar’s Ethnic Heritage Ensemble, состав што повеќе од четири децении го слави афроамериканското музичко наследство преку спој на џез, духовност и ритам. Под водство на Кахил Ел’Забар, мајстор на перкусии и визионер на чикашката авангардна сцена, ансамблот создаде звук што ја исполнуваше салата со пулс на Африка, дух на импровизација и топлина на заедништво.
Со оваа програма, фестивалот уште еднаш потврди дека останува најзначајниот и најдолговечен музички настан во земјата, кој веќе 44 години го отвора Скопје кон светот и го претвора во сцена на глобалниот џез.
Под уметничкото водство на Оливер Белопета, Скопскиот џез фестивал останува верен на својата мисија – да ги спои традицијата и авангардата, да донесе уметници од врвот на светската сцена и да потсетува дека музиката, кога се свири искрено, нема граници.
Следната фестивалска вечер продолжува со настапите на After the Wildfire Quartet и Goran Kajfeš Tropiques, кои ветуваат уште една ноќ исполнета со енергија, слобода и џез што инспирира.
