Со настап на легендарното полско трио Andrzej Jagodziński Trio и Националниот џез оркестар со специјалните гости Sigi Feigl и Luis Bonilla, вчера вечер во Скопје официјално започна 44. издание на Скопскиот џез фестивал – најзначајниот и најдолговечен џез настан во земјата, кој повеќе од четири децении го обликува културниот живот и го поврзува локалниот музички простор со глобалните сцени.
Настанот се одржа пред полна сала и во атмосфера која го слави духот на импровизацијата, уметничката слобода и креативната авантура. Прв на сцената настапи Andrzej Jagodziński Trio, чиј препознатлив спој на класични мотиви и современ џез постави уметнички висок праг за отворањето на фестивалот. Потоа, домашниот Национален џез оркестар со својата силна и енергична изведба ја потврди растечката сила и зрелост на македонската џез сцена.
Фестивал со традиција и визија
Основан на почетокот на 1980-тите, Скопскиот џез фестивал прерасна од локален настан во значајна точка на европската музичка мапа. Низ неговата историја на сцената настапиле легенди како Chick Corea, Wayne Shorter, Herbie Hancock, Esbjörn Svensson Trio, Avishai Cohen, Cassandra Wilson и многу други. Денес, фестивалот е симбол на континуитет, културна отвореност и простор каде традицијата и авангардата се среќаваат.
Оливер Белопета – визионерот зад сцената
Во сржта на фестивалот стои Оливер Белопета, негов основач и уметнички директор, кој веќе четири децении го води проектот со јасна визија: да го отвори Скопје кон светот и да ја постави македонската џез сцена на европската и светската карта. Под негово водство, фестивалот стана повеќе од музички настан – тој е културна институција која ја дефинира идејата за космополитски град и живо културно ткиво.
За време на одржувањето на 24. издание на Off Fest, Белопета гостуваше на Трн во едно од неговите не толку чести појавувања пред камера.
Поглед кон иднината
И оваа година програмата на фестивалот вклучува настапи на врвни џез уметници, иновативни состави и експериментални проекти што покажуваат дека Скопскиот џез фестивал не живее од својата историја, туку постојано го истражува новото и го предизвикува познатото.
Фотографии: Скопски џез фестивал
