Сириската војска соопшти дека темелно го прочешлала округот Шеик Максуд во градот Алепо, сигнализирајќи дека со сила ја презела контролата над областа од курдските борци, откако привремениот прекин на огнот не успеа да ги запре повеќедневните судири во градот.
Насилството во Алепо ја продлабочи една од главните линии на поделба во Сирија, каде што ветувањето на претседателот Ахмед ал-Шара дека ќе ја обедини земјата под еден водач по четиринаесетгодишната војна резултираше со отпор од курдските сили, кои се скептични кон неговата исламистичка влада.
Сите за примирје, курдските сили одбиваат
Соединетите Американски Држави и другите светски сили претходно оваа недела го поздравија примирјето, но курдските сили одбија да го напуштат своето последно упориште во Шеик Максуд, согласно договорот. Поради тоа, сириската војска доцна синоќа објави дека ќе започне копнена операција за да ги протера оттаму.
Сириската војска утринава соопшти дека го завршила пребарувањето на округот, но дека некои курдски борци сè уште се кријат таму. Во писмена изјава, курдските сили негираа дека владата го зазела Шеик Максуд и истакнаа дека сè уште пружаат отпор. Новинарите на Ројтерс во градот наведуваат дека не слушнале ниту индикации, ниту звуци на судири.
Сириски безбедносни извори изјавија дека некои курдски борци, вклучително и дел од нивните команданти и семејства, тајно биле пренесени преку ноќ од Алепо кон североистокот на земјата. Според изворите, околу 300 курдски борци одлучиле да останат во округот и да се борат.
Илхам Ахмад, која раководи со одделот за надворешни односи на курдската администрација, во текот на ноќта го поздрави договорот за „безбедно преместување на борците од Шеик Максуд“ кон источна Сирија, но немаше јавна објава за целосно повлекување.
Курдските сили во Алепо од 2011 година
Военото преземање на Шеик Максуд би значело крај на курдската контрола над делови од Алепо, кои курдските сили ги држат уште од избувнувањето на војната во Сирија во 2011 година. Под нивна управа и понатаму се големи делови од североистокот на Сирија, каде што управуваат со полуавтономна зона.
Тие се спротивставуваа на обидите за интеграција во новата сириска влада, составена од поранешни бунтовнички борци кои во декември 2024 година го соборија долгогодишниот лидер Башар ал-Асад. Поради застојот во преговорите за нивно обединување, во вторникот во Алепо избија борби во кои загинаа најмалку девет цивили, а повеќе од 140.000 луѓе беа принудени да избегаат.
Американскиот пратеник Том Барак денеска во објава на платформата X соопшти дека се сретнал со јорданскиот министер за надворешни работи Ајман ал-Сафади во Аман, со цел да се зацврсти примирјето и да се гарантира „мирно повлекување на курдските сили од Алепо“.
