Силно невреме ги зафати грчките острови. Најлоша е ситуацијата на Крит, објави Прототема.
На Парос и Миконос властите се ангажирани на отстранување на превртени автомобили и остатоци од скршени дрвја по силните дождови и град. Олуите во понеделникот предизвикаа поплави на Парос. Локалните власти побарале итна помош од владата за санација на патиштата и инфраструктурата. Соседниот Миконос исто така беше погоден од силен град и олујни ветрови.
На Крит спасувачките екипи евакуирале седум лица затворени во автомобили поради надојдени води. Пријавени се и одрони на камења и затворање на патиштата откако невремето се преместило кон југозапад во текот на ноќта. Според податоците на Националната опсерваторија во Атина, најмногу дожд за последните 24 часа паднал во близина на пристаништето Ханија.
На Родос орканските ветрови скинале дрвја и оштетиле возила. Поради невремето беа затворени училишта на неколку острови, а траектниот сообраќај беше делумно или целосно запрен. Овие непогоди се случија само неколку недели по серијата земјотреси кои ги погодија Санторини и соседните острови Иос, Аморгос и Анафи.
Силно невреме во понеделник попладне ги зафати Кикладите и Евија, а предупредување беше издадено и за островите во источниот дел на Егејското Море, вклучувајќи ги Хиос, Самос и Икарија. Според податоците на грчката метеоролошка служба, најголема дневна количина на дожд во понеделник беше забележана на Миконос – 71,6 милиметри, од кои 65 милиметри паднаа за само два часа.
