Според податоците на шведските вооружени сили, станува збор за дел од поширока руска операција за заштита на санкционирани бродови кои, меѓу другото, транспортираат руска нафта. Активностите се манифестираат преку зголемено присуство на воени бродови во одредени делови на Балтикот, како и преку појава на вооружени лица директно на самите танкери.
Началникот на оперативниот оддел на Шведската морнарица, Марко Петковиќ, потврди дека информациите за присуство на вооружен персонал на некои пловила се проверени и потврдени. Тој изјави дека руската морнарица сè почесто ги надгледува и обезбедува пловните рути во Балтичкото Море и Финскиот Залив.
Од шведската армија наведуваат дека присуството на бродови од руската Балтичка флота станува сè постојано и опфаќа значителен дел од морската област, но додаваат дека засега не постои директна закана и дека ситуацијата е под целосен надзор.
Слично предупредување упати и заменик-началникот на оперативниот оддел на Шведската крајбрежна стража, Даниел Стенлинг, кој посочи на зголемената активност на руски воени бродови во стратешки важни подрачја во близина на шведскиот брег.
Тој оцени дека информациите за вооружено присуство на танкерите укажуваат на посебната важност што Русија ѝ ја придава на „флотата во сенка“, како и на дополнителните безбедносни мерки што ги презема.
Ова не е прв ваков случај – во јуни руски воен брод за првпат јавно придружуваше санкционирани танкери низ европските води и каналот Ла Манш.
Извор:Index.hr
