Шведска ќе испрати радари и воени системи за борба против дронови во Данска пред претстојните европски самити во Копенхаген, изјави во понеделникот шведскиот премиер Улф Кристерсон. Оваа одлука следи по серијата инциденти со дронови, поради кои Данска беше приморана да затвори неколку аеродроми.
Данска во среда ќе биде домаќин на состанок на лидерите на Европската унија, а во четврток ќе се одржи самитот на пошироката Европска политичка заедница, во која членуваат 47 држави. Безбедносните мерки околу настанот веќе се зајакнати, откако беа забележани беспилотни летала над чувствителни локации.
Минатата недела дронови предизвикаа нарушувања во воздушниот сообраќај на шест дански аеродроми, вклучително и на аеродромот во Копенхаген – најпрометниот во нордискиот регион. Данската премиерка Мете Фредериксен го опиша инцидентот како „хибриден напад“ врз нејзината земја.
Кристерсон на социјалната мрежа X објави дека Шведска ќе испрати Counter-UAS системи (системи против беспилотни летала) и дека во неделата ѝ испорачала на Данска „помал број“ радарски системи.
Во неделата, Данска воведе целосна забрана за цивилни летови со дронови, откако во текот на ноќта беа забележани дронови над неколку воени објекти.
НАТО во саботата објави дека ја засилува својата мисија во Балтичкото Море како одговор на настаните во Данска, а германската фрегата за воздушна одбрана пристигна во Копенхаген во неделата за да помогне во надгледувањето на воздушниот простор.
Иако Данска сè уште официјално не обвинила ниедна држава за инцидентите, премиерката Фредериксен сугерираше дека Русија би можела да стои зад нападите, нарекувајќи ја „најголема закана за европската безбедност“. Кремљ негираше каква било вмешаност во инцидентите со дронови, пренесува Ројтерс.
