Швајцарија привремено ја затвори својата амбасада во Техеран поради „сè поголемиот безбедносен ризик“, соопштија властите.
Со децении Швајцарија ги претставува американските интереси во Иран. Американската влада, како што беше наведено, „ја почитува одлуката на швајцарската влада“ и е „длабоко благодарна за посветеноста“ на амбасадата и нејзиниот персонал, соопшти американската амбасада во Берн.
Во соопштението се додава дека нивната работа „останува клучна за заштита на американските интереси и поддршка на американските граѓани“.
Комуникациската линија останува отворена
Швајцарската влада соопшти дека, во консултација со засегнатите земји, ќе продолжи да одржува отворена комуникациска линија меѓу Соединетите Американски Држави и Иран.
Швајцарскиот амбасадор во Техеран и уште пет членови на дипломатскиот персонал ја напуштиле земјата по копнен пат во средата и сега се на безбедно надвор од Иран, соопшти владата.
„Ќе се вратат во Техеран веднаш штом ситуацијата го дозволи тоа“, се наведува во соопштението.
Преку својата амбасада во Техеран, Швајцарија со години имаше улога на посредник во пренесување пораки меѓу САД и Иран, како и во помош на американски државјани во случај на потреба.
