Црногорската публика ќе има можност да стане дел од уникатен театарски експеримент каде што границите меѓу уметност реалност се бришат.
Перформансот зема инспирација од богомилското движење – дуалистичко учење што се борело против феудализмот и црковната хегемонија во средновековието. Богомилите се спротивставувале на високите данoци и неправедните поделби диктирани од црквата, која во тоа време била единствен извор на вистина, образование, наука и религија.
Преку интерактивен пристап, перформансот го пренесува ова историско искуство во денешниот контекст каде што постојат повеќе извори на вистина. Пред очите на публиката, нараторот на претставата е уапсен, и со тоа се отвара судскиот случај „Јаболко“. Перформансот може да се гледа како експеримент за тоа дали публиката (современиот човек) е под влијание од медиумските вистини или им верува на сопствените искуства.
Перформансот е развиван за време на резиденција на фестивалот „Вртешка интердисциплинарни активности“ и Стровија мултикултурен фестивал. Резиденцијалниот карактер на развојот на проектот овозможи интензивна креативна соработка и заедничко истражување на концептот меѓу авторите. Екипата ја сочинуваат: Марио Стојаноски (текст), Борис Василески (режија), Лука Тошев (музика), продуценти се: Дамјан Читкушев, Андреј Богатиноски и Андреа Маркоска. Оваа изведба во Црна Гора е трета актерска подела и тоа со актерите: Томислав Давидовски, Ане Блажовски, Михаил Велков, Ана Грамосли, Ава Хусеини и Вера Тошева.
Овој иновативен театарски проект ги поставува фундаменталните прашања за природата на вистината, моќта и слободата во современото општество, користејќи ги историските паралели за да создаде релевантен коментар за денешницата.
Перформансот е во продукција на независниот театар „Штрих“ од Скопје кој активно постои од 2021 година и го сочинуваат млади театарџии.
