Француската Агенција за цивилно воздухопловство (DGAC) им нареди на авиокомпаниите да откажат 40% од летовите на трите главни аеродроми во Париз во петок, како дел од мерките за справување со протестот. Контролорите на летање го оправдуваат штрајкот со недостиг на персонал и застарена техничка опрема.
Дополнително, до 50% од летовите на други аеродроми низ Франција, особено на југот, беа погодени од штрајкот, соопшти DGAC.
Францускиот министер за транспорт, Филип Табаро, го нарече штрајкот „неприфатлив“. Во изјава за CNews, тој изјави:
„Идејата е да се вознемират што е можно повеќе луѓе“.
И покрај големиот број откажувања, DGAC предупреди дека патниците и натаму ќе се соочуваат со доцнења и значителни прекини во авиосообраќајот.
Според лоби-групата Airlines for Europe (A4E), во текот на двата дена од штрајкот се откажани 1.500 летови, со што биле засегнати околу 300.000 патници, а голем дел од останатите летови имале сериозни одложувања.
Извор: Index.hr
