Навремената проверка ќе ви обезбеди безбедна и комфорна возачка авантура, без непријатни изненадувања по патот.
Меѓу најважните работи што мора да се проверат се: моторното масло и филтерот, течност во кочнците, течноста за ладилникот (антифриз), фреонот за климата, течноста за шофершајбната, масло за серво воланот, како и притисокот во гумите – не заборавајте и на резервното тркало и потребниот алат! Проверете дали сите светла функционираат – од дневните до стоп-светлата, бидејќи неисправната сигнализација не само што е ризик, туку може да резултира и со казна.
Покрај основната техничка проверка, проверете го и акумулаторот – неговиот век трае околу четири години, а можно е и да се дополни или замени ако е празен. Не заборавајте на метлиците на бришачите – во услови на дожд, снег или кал, тие се од клучно значење за вашата видливост. Клима уредот исто така треба да е во добра состојба, бидејќи придонесува не само за удобноста, туку и за концентрацијата на возачот.
Препорачливо е пред патување да се сменат сите филтри – особено воздушниот и филтерот за гориво, кои играат клучна улога во работата на моторот. Валкан филтер може да доведе до зголемена потрошувачка на гориво и послаби перформанси. Според производителите, филтрите треба да се менуваат редовно, а моторното масло – барем еднаш годишно, без разлика на километражата.
На крај, не заборавајте да го спакувате задолжителниот прибор: прва помош, елек за зголемена видливост, триаголник, резервни сијалици, кабли за стартување и основен алат. Важно е и да имате батериска лампа и резервен клуч. Со темелна подготовка, вашиот автомобил ќе биде сигурен сојузник на патот – а вие ќе можете безгрижно да уживате во патувањето.
