Станува збор за ферментиран чај, најчесто со лесна газираност слична на безалкохолно пијалок и благо квасна нота како пиво, кој е богат со пробиотици и здрави киселини.
Комбухата е позната по своето позитивно дејство врз дигестивниот систем, а некои истражувања ја поврзуваат со зголемено ниво на енергија и намален ризик од дијабетес. Еве што велат нутриционистите и зошто се препорачува редовна консумација.
Што е комбуха?
Комбуха е ферментиран пијалок направен од црн или зелен чај, на кој се додава т.н. „скоби“ (анг. SCOBY – симбиотска култура на бактерии и квасци). Процесот на ферментација трае од 7 до 30 дена, објаснува нутриционистката Лорен Слејтон.
„Иако за многумина изгледа како модерен тренд, комбухата се произведува веќе повеќе од 2000 години“, вели таа и додава дека пијалокот има лесно пенлива текстура и специфичен киселкасто-сладок вкус кој варира во зависност од чајот и другите состојки.
Иако содржи многу малку алкохол (под 0,5%), комбухата се смета за безалкохолен пијалок. На пазарот постојат и алкохолни верзии, но најчесто се консумираат токму безалкохолните, поради здравствените придобивки што ги нуди.
1. Подобрување на дигестијата
Најпознатата предност на комбухата е позитивното влијание врз варењето. Пробиотиците во пијалокот помагаат да се воспостави рамнотежа меѓу „добрите“ бактерии во цревата.
Нутриционистите често ја препорачуваат кај луѓе кои имаат проблеми со запек. Освен тоа, оцетната киселина во комбухата може да го успори празнењето на желудникот и да го продолжи чувството на ситост, а глукуроновата киселина ја поддржува функцијата на црниот дроб. Но, поради природната газираност, кај некои лица може да предизвика надуеност.
2. Зголемување на енергијата
Комбухата се подготвува од чај кој содржи кофеин, па иако не е силна како кафето, сè уште има стимулирачки ефект. Обично содржи околу 15 mg кофеин по чаша – значително помалку од кафето, кое има околу 90 mg.
Освен кофеин, комбухата содржи и витамини од Б-групата, кои се создаваат при ферментацијата и можат дополнително да придонесат за зголемена енергија и подобро општо расположение.
3. Зајакнување на имунитетот
Комбухата е богата со витамини и минерали кои придонесуваат за посилен имунолошки систем. Минерали како калциум, манган и флуор можат да помогнат во одржување на здрави коски и да го намалат ризикот од болести како остеопороза. Присутните антиоксиданси, пак, го поддржуваат здравјето на срцето со намалување на лошиот холестерол.
4. Регулација на шеќерот во крвта
Истражувањата покажуваат дека ферментираните пијалаци богати со полифеноли и органски киселини можат да помогнат во регулацијата на инсулинот и нивото на шеќер во крвта. Во комбинација со здрава исхрана, ова може да го намали ризикот од појава на дијабетес тип 2.
Сепак, важно е да се има на ум дека при подготовката на комбуха се користи шеќер за „хранење“ на бактериската култура – иако дел од него се троши при ферментацијата, количината на остаточен шеќер може да варира. Затоа, секогаш проверувајте ги етикетите при купување.
Извор: Index.hr
