Драган Б. Костиќ, легендарниот водител на радио-емисиите „Диско селектор” и „Заборави ако можеш”, на денешната прес конференција пред претстојниот настан на 29 ноември во СРЦ Јане Сандански, сподели незаборавни приказни од својата 50-годишна кариера.
Тој вети дека ќе направи одлична журка за сите генерации, при што на почетокот на настанот ќе ја замоли публиката да се одржи во ретро стил и да избегне користење на телефони. Во своето обраќање, Костиќ изрази разочараност што, и покрај својата 35-годишна кариера како радио водител, ниту еден колега не го повикал за интервју. „Не ме повикале, а можеле да научат нешто од мене“, рече тој.
Тој исто така истакна дека емисијата „Диско селектор”, која има 50-годишна традиција, нема никаков запис во МРТВ. „Не ќе ми верувате, ниедна емисија не постои. Јас ќе си заминам еден ден, и нема да има никаков траг“, додаде Костиќ.На прес конференцијата, Костиќ најави дека овој последен сценски танц е симболичен настан за Денот на поранешната голема Република и дека ќе биде незаборавен момент за сите негови обожаватели. „Ќе има разлика од претходните журки, ќе видат оние што ќе дојдат“, увери тој.
Драган Б. Костиќ е познат новинар и водител, со над 14.000 радио емисии и 20.000 часа минати пред микрофон. Како диџеј, организирал преку 2.000 настани и имал големо влијание на музичкото и културно образование на повеќе од пет генерации.
