Што ни кажува последната рунда дипломатски разговори за Украина за расположението и намерите на рускиот претседател Владимир Путин? Според анализата на Би-Би-Си, за почеток, дека тој не е подготвен да потпише мировен договор. Барем не сега. И сигурно не договорот (или договорите) што се на маса.
„Компромисна верзија сè уште не е пронајдена“, коментираше помошникот за надворешна политика на Кремљ, Јуриј Ушаков, по петчасовните разговори во Москва во кои учествуваа Путин, американскиот претставник Стив Виткоф и советникот и зет на Доналд Трамп, Џаред Кушнер.
Путин не се повлекува
Недостатокот на компромис не е вистинско изненадување, со оглед на бескомпромисните коментари на лидерот на Кремљ во последните денови. Во разни изјави, тој го осуди украинското раководство како „одметничка хунта“, ги обвини европските лидери дека се обидуваат да ги саботираат мировните напори и инсистираше дека Русија ја држи иницијативата на бојното поле. Во неколку неодамнешни прилики, руската телевизија го прикажа Путин во воена униформа, како ги проучува картите на фронтот и ги труби воените придобивки, од кои многу Украина и меѓународните набљудувачи ги негираа.
По речиси четири години од целосната инвазија на Русија врз Украина, и покрај тешките загуби што Русија ги претрпе на бојното поле и штетата што ѝ ја нанесе на руската економија, претседателот Путин се чини уверен дека ја добива оваа војна и дека сега не е време да се запре. Барем така би сакал да верува Западот: дека ништо сега не може да го спречи да ги постигне своите цели.
Автомобил без сопирачки
Според анализата на Би-Би-Си, Владимир Путин во многу аспекти потсетува на автомобил без сопирачки, без волан и без брзина за рикверц; возило кое брзо се движи по автопатот. Речиси четири години по тоталната инвазија на Украина, сè уште нема знаци дека „Путинмобилот“ ќе биде исклучен, вратен назад или запрен. Тој сигурно сака неговите противници да мислат дека ништо или никој не може да го принуди да ја смени насоката: ниту европските лидери, ниту администрацијата на Трамп, ниту претседателот Зеленски. Но, автомобилите имаат потреба од гориво (постојано снабдување).
А, за да водат војна, на земјите им се потребни пари (постојано снабдување) . Засега, и покрај меѓународните санкции, руската влада сè уште е во можност да финансира „специјална воена операција“ – нејзината војна против Украина.
Но, економските притисоци растат: приходите од нафта и гас опаѓаат, буџетскиот дефицит расте.
Дури и Путин признава дека има проблеми, осврнувајќи се на „нерамнотежи“ во економијата.
„Во неколку сектори, производството не само што не порасна оваа година, туку всушност опадна“, рече Путин оваа недела. „Дали сме задоволни од ваквите трендови? Не.“
Големата непознаница е: Во кој момент, економските грижи ќе почнат да влијаат на пресметките на Кремљ на бојното поле?
