Социјалната мрежа UpScrolled бележи нагол скок на интерес во САД, токму во период кога TikTok минува низ преструктуирање поврзано со сопственоста и новиот модел на управување. Апликацијата, според достапните листи на продавниците за апликации, станува најсимнувана социјална платформа во САД и Канада, а раст се забележува и во неколку европски земји
UpScrolled е социјална апликација која се претставува како простор за „слободно изразување, споделување моменти и поврзување“ надвор од класичните големи технолошки платформи. Платформата ја создал Исам Хиџази, а Euronews наведува дека интересот нагло пораснал по договорот на ByteDance (компанијата сопственик на TikTok) со американски инвеститори за формирање заедничко вложување „TikTok-US“.
По преструктуирањето, дел од корисниците тврделе дека не можеле да објавуваат анти-Трамп видеа или да испраќаат пораки со зборот „Epstein“, што дополнително ја засили дебатата за модерацијата и видливоста на содржините.
Според описот во текстот, UpScrolled личи на комбинација од познати формати:
– „стори“ објави и класичен фид како кај Instagram,
– следење хаштази и трендови како кај X,
– „Discovery“ страница за најпопуларни видеа, налик Snapchat/Instagram.
Euronews наведува и дека апликацијата собира одредени податоци (лични информации, локација, фотографии и видеа, како и податоци за користење), а компанијата тврди дека тоа е за безбедност, спречување измами и управување со сметки, со нагласување дека не дели податоци со трети страни и дека корисниците можат да ги избришат собраните информации.
UpScrolled не е првиот обид да се искористи турбуленцијата околу TikTok. И во претходни моменти на неизвесност корисници се префрлале на алтернативи, како RedNote, а во Австралија дел од младите барале други апликации по најавени ограничувања за профили под 16 години
