Според истражувањата на кои се повикува Daily Mail, просечната жена поседува околу 100 парчиња облека – кошули, маици, панталони, здолништа и фустани. Но, и покрај таа бројност, изборот секојдневно изгледа како невозможна мисија.
Во просек, жените дневно трошат околу 17 минути размислувајќи што да облечат. Кога тоа ќе се помножи со бројот на денови меѓу 18. и 60. година, се доаѓа до заклучок дека повеќе од шест месеци од животот се поминуваат во борба со гардеробата.
Повеќе од половина испитанички (62%) признаваат дека им се расипува расположението кога не се задоволни со изгледот, што влијае и на самодовербата и на начинот на кој го започнуваат денот. Наместо со сигурност и позитивна енергија – денот почнува со фрустрација.
Овој, наизглед банален проблем, има пошироки последици. Многу жени доцнат на работа, состаноци или настани поради одлуката што да облечат, а една од дваесет признава дека понекогаш и целосно се откажува од излегување од дома – бидејќи чувствува дека „нема што да облече“.
Проблемот неретко се пренесува и во партнерските односи – секоја петта жена признала дека имала расправија со својот партнер поради облека, што дополнително ги комплицира секојдневните односи.
Изборот на облека, значи, не е само прашање на мода – туку и психолошки и социјален предизвик кој заслужува повеќе внимание.
