Сепак, еден елемент ќе биде малку поинаков. Истата година кога Лос Анџелес претрпе разорни шумски пожари кои ги опустошија приградските населби, една од поволностите што ќе се најдат во кесите со подароци е едногодишното членство во Bright Harbor, служба за закрепнување од катастрофи што им помага на преживеаните.
Покрај личното членство, секој номиниран ќе добие уште 10 членства „што ќе може бесплатно да им ги подари на пријателите, семејството, соседите, дури и обожавателите кои можеби ги изгубиле домовите во пожарот во Лос Анџелес“, рече Лаш Фери, основач на Distinctive Assets, компанијата која ги обезбедува торбичките со подароци.
За 23-та година, маркетинг фирмата за забавната индустрија со седиште во Лос Анџелес ќе ги достави своите торби со подароци на номинираните, чија вредност е над 200.000 американски долари за секоја. Подароците се избрани независно од Академијата, која ги организира Оскарите во недела навечер.
Номинираните, исто така, ќе можат да уживаат во приватно шоу на локален волшебник, комплет за ДНК за истражување на нивното потекло, и палто за нивното домашно милениче, направено од рециклирана дизајнерска облека.
„Ова е Калифорнија и ова е стресна недела за многу од овие луѓе. Значи, имаме четири различни опции од канабис за нив“, додаде Фари, посочувајќи на е-цигарите, гуми за џвакање и маргаритите со THC.
Повеќето од номинираните нема да ја добијат посакуваната статуетка за Оскар, но можат да се утешат во изборот помеѓу одмор во вила на Малдиви, велнес одморалиште во Шри Ланка или хотел со пет ѕвезди во Барселона.
Освен што им го разубавуваат денот на номинираните за престижната филмска награда, подароците служат и како платформа за промовирање на мали бизниси, брендови во малцинска сопственост и компании кои придонесуваат за заедницата, велат од компанијата Distinctive Assets.
