Шпанската влада ќе додели едногодишни дозволи за престој и за работа на дури 25.000 странци погодени од катастрофалните поројни поплави што го погодија источниот дел на земјата во октомври минатата година.
Мерката, којашто вчера беше одобрена од шпанскиот кабинет, ќе ја олесни документацијата за оние кои сега останаа без покрив над главата во десетици градови погодени од поплавите, главно во регионот на Валенсија.
Министерството за инклузија, социјално осигурување и миграција соопшти дека хаосот што произлезе од поплавите, предизвикани од поројните дождови, остави многу имигранти без можност да ги исполнат условите за легално живеење, студирање и работа во Шпанија. Многу работодавци исто така останаа немоќни да се усогласат со бирократијата потребна за ангажирање странски работници.
Министерството соопшти дека ќе бидат доделени нови едногодишни дозволи поради „неочекувани исклучителни околности“, но истакна дека тие можат и ќе бидат одбиени кога има загриженост за јавниот ред, безбедност или здравје.
Покрај тоа, на странците кои изгубиле роднини во поплавите ќе им биде дозволен петгодишен престој во Шпанија.
Додека владите ширум Европа ги заоструваат своите миграциски политики, Шпанија го кредитира придонесот на работниците мигранти во годината на економски раст и отворање нови работни места. Странците во моментов претставуваат околу 15,9% од регистрираното вработено население во земјата, иако многу повеќе работат во сивата економија, без разлика дали берат овошје, чистат домови или се грижат за стари лица.
