Шпанија ѝ изрече висока казна од 65 милиони евра на платформата Airbnb поради огласување недвижности за краткорочно изнајмување без соодветни дозволи. Одлуката доаѓа во време на зголемен притисок врз владата да го ограничи туристичкиот сместувачки пазар поради продлабочената станбена криза.
Министерството за заштита на потрошувачите соопшти дека казната е конечна и дека Airbnb мора веднаш да ги отстрани сите нелегални огласи. Според властите, повеќе од 65.000 огласи ги прекршувале законите, вклучувајќи објекти без дозволи или со неважечки лиценци. Износот на казната одговара на шесткратната добивка што Airbnb ја остварил од спорните огласи.
Министерот за права на потрошувачите Пабло Бустиндуј изјави дека илјадници семејства живеат „на работ“ поради станбената криза, додека одредени компании профитираат од модели што ги истиснуваат луѓето од нивните домови.
Барселона е предводник во борбата против масовниот туризам и најави целосно укинување на туристичките апартмани до 2028 година. И други региони во Шпанија преземаат слични мерки, при што над 53.000 нелегални туристички станови веќе се отстранети од регистрите низ земјата.
