Шпанија ги отстранува 53.000 нелегални туристички станови од регистарот за да го поттикне пазарот на трајно изнајмување.
Шпанската влада ќе ги префрли околу 53.000 туристички станови во категоријата на трајно изнајмување по откривање неправилности во националниот регистар.
Одлуката ја соопшти премиерот Педро Санчез за време на партиски настан во неделата во Малага.
„Откривме илјадници неправилности во многу од овие домови кои се наменети за летни и туристички изнајмувања. Она што ќе го направиме е да ги отстраниме 53.000 станови од овој регистар, за тие да станат трајно изнајмување за младите и семејствата во нашата земја“, рече тој.
Министерството за домување веќе побара од платформите за туристички сместување, како што се Airbnb и Booking.com, да ги отстранат огласите за овие објекти.
Airbnb во неделата објави дека „ова е ново поглавје за Airbnb во Шпанија, дефинирано со проактивна посветеност на соработка, квалитет и долгорочна визија за одржлив раст што им користи на сите“.
Според компанијата, која имала неколку судири со шпанската влада, околу 70.000 дополнителни огласи сега прикажуваат официјален регистрационен број, што значи дека голем дел од сместувањата сега ги исполнуваат овие барања.
Сепак, во соработка со Министерството за домување, платформата откри дека нешто помалку од 10 проценти од повлечените национални регистри се уште поврзани со активни огласи. Според компанијата, тие огласи ќе бидат веднаш деактивирани.
