Едно од најголемите изненадувања на 98. доделување на наградите на Academy Awards беше победата на Sean Penn во категоријата за најдобра споредна машка улога. Актерот ја освои престижната награда за улогата во филмот One Battle After Another, но не присуствуваше на церемонијата за лично да ја прими статуетката.
Неговото име на сцената го објави Kieran Culkin, кој ја презеде наградата во негово име и се пошегува со неговото отсуство, велејќи дека актерот „или не можел или не сакал да дојде“. Победата на Пен дојде во силна конкуренција во која беа и Benicio del Toro, Jacob Elordi, Delroy Lindo и Stellan Skarsgård.
Со ова признание, Пен го освои својот трет Оскар во кариерата и се израмни со актерите Jack Nicholson, Walter Brennan и Daniel Day-Lewis, кои исто така имаат по три златни статуетки. Претходно тој беше награден за главна машка улога во филмовите Mystic River и Milk.
Отсуството на актерот предизвика бројни реакции, особено затоа што ова не е првпат да пропушти значајна церемонија. Тој неодамна не се појави ниту на наградите на SAG-AFTRA, што дополнително ја поттикна љубопитноста на јавноста.
Во филмот на режисерот Paul Thomas Anderson, Пен го толкува ликот на корумпиран воен офицер кој прогонува револуционерна група. Засега не е познато зошто актерот не присуствуваше на доделувањето, а неговиот тим сè уште нема официјално објаснување за изостанокот.
