UEFA Euro 2028, кое ќе се одржи во Англија, Шкотска, Велс и Ирска, воведува нов пристап кон цените на билетите со цел да им излезе во пресрет на навивачите. UEFA потврди дека дури 40% од билетите ќе бидат во најевтината категорија „Fans First“, со што се овозможува поголема пристапност за пошироката публика.
Според податоци од FIFA World Cup 2026, цената за едно паркинг место на стадионите во САД изнесува околу 155 евра, што е поскапо од пет најевтини билети за ЕУРО 2028. За споредба, најевтините билети за групната фаза на Европското првенство ќе чинат околу 30 евра, додека следната категорија ќе изнесува околу 60 евра.
За разлика од моделот на FIFA, кој користи динамичко формирање на цени зависно од побарувачката, УЕФА се одлучи за фиксни цени. Тоа значи дека цените нема да растат во периоди на голема побарувачка, со што се избегнуваат нагли поскапувања за навивачите.
УЕФА исто така планира официјална платформа за препродажба на билети по номинална цена, со цел да се спречи црниот пазар и енормното зголемување на цените. Во споредба, ФИФА се соочува со критики поради високи провизии од околу 30% при препродажба на билети.
Дополнително, за секој натпревар од групната фаза ќе бидат распределени околу 10.000 билети по земја, што е значително повеќе од претходните модели. Посебно внимание е посветено и на навивачите со попреченост, кои ќе имаат пристап до најевтините билети, како и бесплатен придружник. Овие разлики ја покажуваат поделбата меѓу европскиот модел, кој го става навивачот во фокус, и американскиот пристап кој повеќе се базира на профит и динамика на пазарот.
Целосниот ценовник за ЕУРО 2028 ќе биде објавен во 2027 година, но се очекува цените да останат значително пониски од оние на Светското првенство.
