Новата фабрика на Rheinmetall во северна Германија, која треба да стане најголем европски капацитет за производство на муниција, е уште еден чекор во обидот на Европа да го стигне руското производство, изјави генералниот директор на компанијата Армин Папергер за CNBC.
Русија има капацитет да произведува меѓу четири и пет милиони парчиња артилериска муниција годишно, изјави Папергер, додека Европа произведува околу два милиони парчиња годишно — од кои повеќе од половината доаѓаат од фабриките на Rheinmetall.
„Во моментов, на Европа ѝ се најпотребни артилериска муниција и ракети“
Европската унија дава поддршка на Украина во нејзините воени напори за спротивставување на руската инвазија, додека долгорочните планови на САД за поддршка на Киев сè уште не се јасни. Папергер истакна дека токму артилериската муниција и ракетите се „најпотребни“ во моментов, а токму тие производи ќе бидат во фокусот на новата фабрика во германскиот град Унтерлис.
Се очекува дека производството во фабриката ќе достигне 350.000 парчиња артилериска муниција до 2027 година.
„Даваме сè од себе, правиме сè што можеме за да го забрзаме процесот. Претходно разговарав за ова со (германскиот министер за одбрана) Борис Писториус. Тој рече: ‘Забрзајте.’ Мораме да направиме уште повеќе“, изјави Папергер за CNBC.
„Германската влада е исклучително коректна кон нас“
Како и другите европски земји и членки на НАТО, Германија се обврза дека во следната деценија ќе ја зголеми потрошувачката за одбрана и ќе ја прошири армијата. Овој чекор ѝ овозможува на владата во Берлин да ги искористи претходните реформи во буџетските правила за задолжување.
Германија вети дека ќе ја зголеми потрошувачката за одбрана на 153 милијарди евра до 2029 година — повеќе од двојно од сегашната. Некои аналитичари сметаат дека Германија има повеќе фискален простор за реализација на ова ветување отколку Франција, Италија или Обединетото Кралство.
Rheinmetall, пак, очекува нови договори во четвртиот квартал од оваа година и првиот квартал од 2026 година, изјави директорот. Тој додаде дека компанијата веќе добила аванс од државата, што ѝ овозможило нови инвестиции.
„Германската влада е исклучително коректна кон нас“, нагласи Папергер.
