Европскиот економски и социјален комитет (EESC), советодавна институција во Брисел која вклучува 329 претставници на невладини организации, синдикати и работодавачи, повтори во средата дека продолжува да го поддржува цивилното општество и дијалогот во Србија, каде што веќе траат антивладините протести четири месеци.
„Патував неколку пати во Србија и не се двоумам да одам повторно таму. Во многу близок контакт сме со цивилното општество во Србија, ги поддржавме“, изјави претседателот на EESC, Оливер Ропке за агенцијата Хина за време на Неделата на цивилното општество во Брисел, пренесува Н1 Хрватска.
„Лично се надевам дека овој моќен протест ќе донесе некаква промена, но се надевам и дека ќе преовлада отсуството на насилство. Продолжуваме да го поддржуваме српското цивилно општество и го поддржуваме дијалогот. Дијалогот е најдобриот начин“, додаде тој.
Протестите во Србија започнаа во ноември, по падот на надстрешницата на главната железничка станица во Нови Сад, при што загинаа 15 лица. Претседателот на Србија, Александар Вучиќ, неодамна изјави дека протестите против него се финансирани од меѓународни организации, па дури и од странски влади.
Пет хрватски претставници на невладини организации, кои учествуваа на работилници организирани од австриската фондација Erste Stiftung во Белград, беа приведени и протерани од Србија на 21. јануари.
Европскиот економски и социјален комитет објави десет дена подоцна соопштение во кое изрази „длабока загриженост“ поради случувањата во Србија и загрижувачките извештаи за „растечките притисоци“ на претставниците на цивилното општество.
„Заштитата на слободата на изразување, слободата на здружување и собирање на граѓаните и организациите на цивилното општество се основни права и треба да се почитуваат дури и во времиња на немири и протести“, изјави EESC.
Што е EESC?
Европскиот економски и социјален комитет е институција со која се консултираат Европската комисија, Европскиот парламент и Советот на ЕУ при донесување закони на ниво на Европската унија. Комитетот ги застапува интересите на работодавачите, синдикатите и цивилното општество од различни области.
Во септември 2023 година, беше одлучено да се вклучат претставници од земјите кандидати – Албанија, Босна и Херцеговина, Грузија, Молдавија, Црна Гора, Северна Македонија, Србија, Турција и Украина во својата работа.
Од февруари 2024 година, во советодавната работа учествуваат вкупно 146 претставници од овие земји.
