Изложбата ја потсетува јавноста на карактеристичниот архитектонски идентитет кој градот го изгради по катастрофалниот земјотрес во 1963 година. Куратор на павилјонот е архитектот Благоја Бајковски, кој потсетува дека меѓу клучните влијанија врз обновата бил и планот на Кензо Танге, изработен по меѓународниот конкурс на Обединетите нации во 1965 година.
Во павилјонот се изложени макети на десет значајни објекти од брутализмот, поставени во форма на концептуална „улица“, што отвора простор за нови интерпретации на нивното значење денес. Изложбата е поделена во два дела – „Графичка биографија“, која ја истражува архитектонската комплексност на објектите, и „Критичка рефлексија“, со текстови од 20 современи архитекти и урбанисти.
Покрај Бајковски, во тимот на павилјонот учествуваат и Ана Рафаиловска, Марија Антиќ Николова, Невенка Манчева Аџиевска, Теа Дамјановска, Михајло Стојановски и Мери Батакојa.
„Strada Brutalissima“ директно се инспирира од легендарната „Strada Novissima“ на Венециското биенале во 1980 година, но овојпат фокусот е ставен на скопското архитектонско наследство и неговата современа релевантност.
19-тото Венециско биенале за архитектура, со куратор Карло Рати, е отворено за јавност од 10 мај и ќе трае до 23 ноември 2025 година. Темата на ова издание е „Intelligens. Natural. Artificial. Collective.“, која истражува како архитектурата може да користи различни форми на интелигенција за справување со глобалните предизвици.
Извор: Archdaily
