Кралската саудиска морнарица е распоредена во Арапското Море со цел спроведување операции против криумчарење, соопшти портпаролот на коалицијата предводена од Саудиска Арабија. Истовремено, Јужниот преоден совет (STC), сепаратистичка група на југот на Јемен, најави почеток на двегодишен транзициски период кој треба да заврши со референдум за независност на јужниот дел од земјата.
Претседателот на STC, Аидарус ал-Зубаиди, изјави дека по завршувањето на двегодишната транзиција ќе се одржи референдум за независност на Јужен Јемен. Тој, исто така, ја повика меѓународната заедница да ги спонзорира разговорите меѓу релевантните актери од југот и северот на земјата за идниот политички пат, како и за механизмите што би ги „гарантирале правата на жителите на југот“.
Овие најави доаѓаат по судирите меѓу коалицијата предводена од Саудиска Арабија и силите на STC во покраината Хадрамаут, при што силите лојални на гувернерот Салем ал-Канбаши ја презедоа најголемата воена база во регионот од рацете на сепаратистите.
Ал-Канбаши, гувернер на Хадрамаут кој има поддршка од Саудиска Арабија, изјави дека неговите сили, по преземањето на базата Ал-Кашаа, најголемата воена база во покраината, се движат кон клучниот град Сејјун. Тој ги повика силите на STC да се повлечат со цел да се спречи понатамошно крвопролевање.
Владата на Јемен, поддржана од Саудиска Арабија, соопшти дека Ал-Канбаши е назначен за врховен командант на силите „Штит на татковината“ во источната покраина, со што му се доделени целосни воени, безбедносни и административни овластувања. Овој чекор беше опишан како мерка за обновување на безбедноста и редот.
„Ова не е објава на војна“, изјави Ал-Канбаши во обраќање на јеменската телевизија, додавајќи дека целта е да се спречи користењето на воените бази за загрозување на безбедноста и да се заштити Хадрамаут од паѓање во хаос.
Во меѓувреме, Кралската саудиска морнарица е распоредена во Арапското Море за борба против криумчарење, потврди портпаролот на коалицијата. Турки ал-Малики во објава на социјалната мрежа Икс наведе дека целта на овој потег е зајакнување на поморскиот надзор и спроведување оперативни задачи со цел да се обезбедат безбедност и стабилност во регионот.
Што значи контролата врз Јемен
Како што известува Al Jazeera, борбата за Јемен повеќе не е само внатрешно прашање на таа земја, туку прерасна во регионално прашање. Во конфликтот се вклучени и меѓународни актери; Соединетите Американски Држави, на пример, водат воени операции против Сана. Клучното прашање станува кој ќе го контролира Јемен, бидејќи оној што ќе има контрола ќе оствари значително влијание врз регионалната рамнотежа на силите.
Контролата врз Јемен подразбира и влијание врз Црвеното Море, како и можност за давање или ускратување безбедносни гаранции за Израел. Поради тоа, конфликтот е многу поширок од самиот Јемен и од самиот почеток има регионален карактер.
Војната во Јемен сè повеќе ги доведува Саудиска Арабија и Обединетите Арапски Емирати лице в лице. Исходот од конфликтот може да зависи од степенот на странско вмешување. Предноста на јеменската влада поддржана од Ријад е подготвеноста на Саудиска Арабија да прибегне кон воени операции, додека ОАЕ се значително повоздржани кога станува збор за директен воен ангажман.
Сепак, значителен број воени бази, контролни пунктови и стратешки локации и натаму се под контрола на единиците на STC.
Без оглед на исходот на југот, останува фактот дека вистинската моќ е во Сана, која е под контрола на движењето Хути.
Хутите располагаат со најголемиот арсенал на оружје и се способни да наметнат блокада на Црвеното Море.
Нивните лидери и функционери порачуваат дека нема да ја прифатат ниту јеменската влада поддржана од Саудиска Арабија, ниту STC поддржан од Обединетите Арапски Емирати, како власт на југот на земјата.
