Можеби звучи тривијално, но тоа колку брзо можете да одите од точка А до точка Б може да открие многу за состојбата на вашето тело и ум. Истражувањата покажуваат дека брзината со која одите – без разлика дали е до продавница, до локалниот парк или до автобуска станица – може да биде индикатор за вашата веројатност да бидете хоспитализирани, да доживеете срцев удар, па дури и да починете. Всушност, темпото на одење може да се користи како показател за степенот на когнитивно стареење.
Тестот за брзина на одење претставува метод за проценка на функционалниот капацитет на поединецот – неговата способност да извршува секојдневни задачи и да одржува независност. Исто така, може да покаже колку е изнемоштено лицето и да предвиди колку успешно ќе реагира на рехабилитација по мозочен удар.
Иако е очекувано луѓето да одат побавно со текот на времето, наглото забавување на одењето може да биде знак за посериозен здравствен проблем.
„Кога нормалното темпо на одење кај некоја личност опаѓа, тоа често е поврзано со влошување на здравствената состојба“, вели Кристина Диели-Конрајт, професорка по медицина на Медицинскиот факултет при Харвард, која ги проучува ефектите од вежбањето врз прогнозата кај пациенти со рак.
„Можеби лицето има хронична состојба поради која не се движи доволно или станало седентарно. Тоа пак доведува до намалување на мускулната сила и подвижноста на зглобовите, што за жал дополнително го влошува здравјето“, додава Диели-Конрајт.
Едноставна техника
За да го направите тестот за брзина на одење, потребни ви се само стоперка и начин за мерење растојание, на пример мерна лента. Постојат две вообичаени верзии на тестот.
Ако сте надвор и имате доволно простор, можете да го направите 10-метарскиот тест. Прво измерете 5 метри за забрзување, па дополнителни 10 метри за мерење на брзината. Одете со нормално темпо и измерете за колку секунди ги минувате тие 10 метри. Брзината ја добивате така што ги делите 10-те метри со бројот на секунди што ви биле потребни.
Ако сте во затворен простор со помалку место, можете да го направите 4-метарскиот тест. Поставете растојание од 1 метар за забрзување, по што следат 4 метри за мерење на брзината. Измерете за колку секунди ги минувате тие 4 метри и потоа пресметајте ја брзината со делење на растојанието со времето.
Извор: BBC
