Погребот на папата Франциско ќе се одржи во сабота, во Ватикан, и ќе биде настан со огромно значење – и верско и дипломатско. Се очекува голема посетеност, со најмалку 200.000 посетители само од странство, според италијанските власти. Покрај верниците, ќе присуствуваат и многу државници и светски лидери меѓу кои и претседателот на САД, Доналд Трамп, генералниот секретар на ОН, Антонио Гутереш и претседателот на Украина, Володимир Зеленски. Рускиот претседател Владимир Путин нема да присуствува, но делегација од Кина ќе биде присутна. Италија, иако Ватикан е суверена држава, ќе помага со логистичка поддршка.
Каков ќе биде обредот?
Папата Франциско во 2024 година лично иницираше поедноставување на папските обреди. Тој ќе биде закопан во еден ковчег, за разлика од претходните три. Ќе биде нарекуван како „римски бискуп“, „пастир“ или „папа“, а без титули како „врховен папа на универзалната црква“. Целта е да се истакне папата како Христов ученик, а не како светски моќник
Обредот ќе го води кардинал Џовани Батиста Ре, 91-годишниот декан на Кардиналскиот колегиум. Мисата ќе се води на повеќе јазици, одразувајќи ја глобалната природа на Католичката црква. Главните молитви на латински и италијански, читањата на шпански, англиски, италијански а кратките молитви на арапски, полски, кинески и други јазици.
По церемонијата, ковчегот на папата Франциско ќе биде пренесен во базиликата Света Марија Велика – црква која тој често ја посетувал и која се наоѓа надвор од ѕидините на Ватикан.
Тој ќе биде првиот папа од 17. век закопан таму и првиот по повеќе од 100 години што нема да биде закопан во Ватикан. Во неговиот тестамент, побарал:
„Едноставен гроб, без украси, со само моето папско име на латински: Franciscus.“
Смиреноста, едноставноста и одбивањето на раскош се одраз и на животот и на смртта на папата Франциско. Оваа последна церемонија е негова последна поука за понизност и христијанска скромност, како порака до Црквата што ја водеше и до светот што внимателно го слушаше.
