Утринава делумно се урна облакодер во њујоршкиот округ Бронкс, а првичните информации за причините за колапсот укажуваат на експлозија на гас, објави локалниот сајт fox10phoenix.com.
Инцидентот се случил утринава кратко по 8 часот, во станбениот комплекс Мичел Хаус на Александар Авенју број 205. Станува збор за 20-катна зграда во која, според противпожарната служба (FDNY), се урнало окното за палење на отпадот, што се протега по целата височина на зградата.
На терен веднаш излегле бројни противпожарни екипи. Снимките од воздух покажуваат десетици пожарникари како ја проценуваат ситуацијата, додека зградата јасно покажува како окното се одвоило од остатокот од структурата.
Според првичните информации, се верува дека на уривањето му претходела експлозија на гас во самото окно за отпад. За среќа, противпожарната служба соопшти дека засега нема извештаи за повредени лица.
Истрагата за точната причина за инцидентот е во тек, а властите се на терен за да го обезбедат местото и да ги утврдат сите околности на настанот.
