Во 2005 година, полицијата го снимала ентериерот на вилата за време на истрагата за сексуална злоупотреба на 14-годишно девојче.
На ѕидовите биле врамени фотографии од жени, многу од нив голи, во бањи, ходници, канцеларии и теретана. Се издвојувале повеќе од десетина слики од Максвел, вклучувајќи една каде што е гола на плажа.
На ѕидовите имало и фотографии од Епштајн со Фидел Кастро и папата Јован Павле Втори.
Тој ја купил луксузната вила во 1990 година за 2,5 милиони долари и ја претворил во центар на криминален круг каде што девојчиња на возраст од само 14 години биле намамувани за „масажи“.
Епштајн починал во август 2019 година во затворска ќелија, пред да му се суди. Соучесничката Максвел моментално отслужува затворска казна за подведување и регрутирање малолетни жртви.
Комисијата за надзор на Претставничкиот дом на САД ги објави досиејата што ги доби од Министерството за правда во вторник, како одговор на растечкиот притисок за расветлување на случајот.
Меѓу објавените досиеја беше „исчезната минута“ од снимката од Метрополитен притворен центар, која недостасуваше од претходните 11 часа снимки од надзорните камери.
Службениците тврдеа дека станува збор за техничка грешка, но сега тој дел е објавен.
Сепак, повеќето документи и снимки веќе беа достапни за јавноста. Илјадници страници и стотици досиеја се појавија на Google Drive, вклучувајќи судски документи, делумно редактирани документи и интервјуа од 2005 година.
Сведоштва и критикувана согласност
Еден од вработените во Епштајн им опиша на полицајците како видел „многу девојки кои биле многу млади“ во куќата, иако не можел да потврди дека сите биле малолетни. Додаде дека морал да ја чисти просторијата каде што се одвивале „масажите“ двапати на ден.
Објавените документи, исто така, вклучуваат детали за контроверзниот договор за признавање на вина на Епштајн со обвинителите од Флорида, кој подоцна беше опишан како „договор на векот“ поради неговата блага природа.
Еден обвинител од Палм Бич изрази негодување во тоа време што одбраната бараше уште помалку ограничувања за веќе регистриран сексуален престапник.
Политички притисоци и нова борба во Конгресот
Објавувањето на досиејата дополнително ја разбранува политичката сцена во Вашингтон. Демократските пратеници бараат Министерството за правда целосно да ги објави сите досиеја на Епштајн, а воедно да го заштити идентитетот на жртвите, објавува Б92.
Сепак, опозицијата истакнува дека повеќето од 33.000 страници откриени од републиканците всушност се јавно достапни со години. Демократот Роберт Гарсија рече:
„Немојте да ве залажува ова – речиси сè беше веќе познато“.
