Австралискиот премиер Ентони Албанезе се ожени со својата петгодишна партнерка Џоди Хејдон на приватна церемонија во The Lodge, официјалната премиерска резиденција во Канбера, јавува NBC. Тој е првиот австралиски премиер кој стапил во брак додека ја извршува функцијата.
Церемонијата ја водела службена претставничка од Нов Јужен Велс, а младенците самите ги напишале своите завети.
„Пресреќни сме што можеме да ја споделиме нашата љубов и посветеност пред нашите најблиски“, се наведува во заедничката изјава на Албанезе и Хејдон.
Поради безбедносни причини, датумот и местото на свадбата биле строго чувана тајна. Невестата до олтарот ја придружиле нејзините родители, Бил и Полин Хејдон, нејзината петгодишна внука Ела фрлала ливчиња, а премиеровото куче Тото ги носело бурмите.
Хејдон била облечена во венчаница од познатата австралиска модна куќа Romance Was Born.
Првиот танц – на Френк Синатра
Кум бил братот на невестата, Патрик Хејдон, а кума – братучедката на премиерот, Хелен Голден. По церемонијата, младенците биле испратени со песната Signed, Sealed, Delivered (I’m Yours) од Стиви Вондер, а првиот танц го изведоа на класиката на Френк Синатра The Way You Look Tonight.
Меѓу присутните гости биле и министри од кабинетот, како и актерот Рис Малдун. Следната недела двојката заминува на петдневен меден месец во Австралија, а сите трошоци за свадбата ги покриле приватно.
Ова е втор брак за Албанезе. Првиот, со политичарката Кармел Тебут, траеше 19 години; се разделија во 2019 година и имаат син, Нејтан.
