Глобалните испораки на паметни телефони ја завршија 2025 година со ниско едноцифрен годишен раст, поттикнат од подобрените макроекономски услови и солидната побарувачка за време на празничната сезона.
Сепак, според најновото истражување Smartphone Market Outlook Tracker на компанијата Counterpoint Research, пазарот во 2026 година ќе се соочи со силен пресврт, со прогнозирано намалување на испораките од 12,4 % во однос на претходната година – што би бил најостриот годишен пад досега.
Counterpoint очекува дека недостигот на меморија, брзата инфлација на цените на компонентите и структурните слабости кај производителите не само што ќе предизвикаат пад во 2026 година, туку ќе го продолжат негативниот тренд и во 2027 година. Опоравување се очекува дури кон крајот на 2027 година, кога ќе се појават дополнителни мемориски капацитети.
Во четвртиот квартал од 2025 година, глобалните испораки пораснале за 3,8 % на годишно ниво, што значи четврто последователно тромесечје на закрепнување и најсилна празнична сезона од 2021 година наваму. Повеќето региони забележале раст, со исклучок на Кина и Источна Европа.
Counterpoint прогнозира дека глобалните испораки во 2026 година ќе паднат под 1,1 милијарда уреди – најниско ниво од 2013 година, кога глобалната транзиција кон 4G мрежите сè уште беше во забрзана фаза.
Главна причина: кризата со меморија
Клучен двигател на падот е наглото влошување на кризата со понудата на меморија. Се очекува цените на мобилната LPDDR4/5 меморија во вториот квартал од 2026 година да достигнат речиси трипати повисоко ниво во споредба со третиот квартал од 2025 година, што укажува на невиден притисок врз понудата.
И International Data Corporation (IDC), во својот извештај Worldwide Quarterly Mobile Phone Tracker, прогнозира пад на глобалните испораки од 12,9 % во 2026 година, на околу 1,1 милијарда уреди.
Дополнително, Gartner предвидува дека растечките трошоци за меморија ќе доведат до пад на глобалните испораки на персонални компјутери од 10,4 %, како и пад на испораките на паметни телефони од 8,4 % во 2026 година во споредба со 2025 година.
Gartner проценува дека комбинираните цени на DRAM и SSD (solid-state drive) ќе пораснат за 130 % до крајот на 2026 година, што би ги зголемило цените на персоналните компјутери за 17 %, а на паметните телефони за 13 % во однос на 2025 година.
