Едно село на Филипините презема необичен пристап за контрола на локалната популација на комарци – нуди финансиска награда за секој што ќе ги зароби, живи или мртви. Локалните власти се надеваат дека доделувањето награда за инсектите ќе ги намали случаите на денга треска, која уби двајца млади студенти во селото.
Жителите ќе добијат награда од еден филипински пезос – нешто повеќе од 1 цент – за секои пет комарци или ларва од комарци коишто ќе ги предадат.
Инаку, денга треската е вирусна инфекција која се шири преку каснување од комарец. Според Светската здравствена организација, многу луѓе имаат благи или воопшто немаат симптоми. Но денгата може да предизвика потешки случаи, па дури и смрт. Денгата се наоѓа во тропските и суптропските клими ширум светот, најмногу во урбаните и полуурбаните области.
Селото Addition Hills во градот Мандалујонг е во густо населената област околу Манила, главниот град на Филипините. Урбано село со повеќе од 100.000 жители кои живеат во преполни населби и станбени згради. Addition Hills досега се обиде со чистење на каналите и хигиенска кампања за борба против денга. Но, кога случаите се искачија на 42 оваа година и загинаа двајца млади студенти, водачот на селото Карлито Цернал реши да ја засили битката.
Критичарите предупредија дека стратегијата би можела да има спротивен ефект доколку очајните луѓе почнат да одгледуваат комарци за наградата. Цернал смета дека тоа е малку веројатно бидејќи кампањата ќе биде прекината веднаш штом ќе се намали зголемувањето на случаите.
Необичната стратегија усвоена од Addition Hills ја одразува зголемената загриженост откако блискиот град Кезон прогласи епидемија на денга во текот на викендот. Уште осум области објавија пораст на случаи на потенцијално смртоносна вирусна инфекција. Најмалку 28.234 случаи на денга се регистрирани на Филипините само во јануари, што е зголемување од 40 отсто во споредба со истиот период минатата година, според статистиката на одделот за здравство.
Кезон Сити прогласи епидемија на денга во саботата по 10 смртни случаи оваа година, главно деца, од 1.769 заразени жители. Официјални лица во друго село во Кезон Сити размислувале да пуштат роеви жаби за да јадат комарци. Секретарот за здравство Теодоро Хербоса рече дека е од клучно значење да се исчистат местата за размножување комарци, а секој што е заразен веднаш да побара лекарска помош. И покрај зголемувањето на инфекциите со денга, Филипините успеаја да одржат ниски стапки на смртност, рече тој.
Случаите на денга неочекувано се зголемија пред сезоната на дождови, која започнува во јуни, најверојатно поради повремените дождови кои оставија стагнантни базени со вода каде што можат да се размножуваат комарците кои предизвикуваат денга, рече потсекретарот за здравство Алберто Доминго, додавајќи дека климатските промени веројатно придонесуваат за вонсезонски пад на дождовите.
