Сведокот Мартин Саздов денеска изјави пред судот дека Ивана му раскажувала дека Стојанче Јовановски секоја вечер кога се враќал дома издрогиран ја тепал пред нивната ќерка Катја, додека истовремено ѝ се заканувал, ја уценувал и психички ја малтретирал, поради што таа живеела во постојан страв и побарала и психолошка помош.
Во своето сведочење, Саздов рече дека Стојанче се дрогирал уште од времето кога двајцата работеле заедно во Пожарната служба, а состојбата дополнително се влошила откако бил фатен со дрога од полицијата. Тогаш, според Саздов, Стојанче почнал да ги обвинува него и Ивана дека му „местеле“ дрога.
Саздов сведочеше и дека Ивана многу се плашела од заканите што ги добивала, особено од тоа што Стојанче ѝ велел дека ќе објави експлицитни видеа од неа за да ја посрамоти. Таа, како што рече сведокот, постојано стравувала и дека може да ѝ ја земе Катја, за која зборувала дека ѝ е „животот“.
Според неговото сведочење, Ивана сакала да си го врати станот што сама го отплаќала и уредувала, затоа што Катја си ја барала својата соба, а имотот за неа претставувал сè за што работела и вложувала. Во меѓувреме, тврдеше Саздов, Стојанче не придонесувал за домашниот буџет, туку ја економски ја искористувал, па дури ја натерал и да извади 40 илјади денари од својата кредитна картичка и да му ги даде.
Саздов рече дека Ивана поради сето тоа била психички скршена, затворена и исплашена, поради што побарала помош и од психолошко советувалиште и почнала да зема антидепресиви. Тој изјави и дека ја убедувал да се тргне од таа средина и да живее кај мајка ѝ, нудејќи ѝ и пари за кирија, но таа не сакала да го напушти станот за кој со години плаќала кредит и се борела сама.
