Шпанскиот премиер Педро Санчез во писмо до членовите на PSOE изјави дека со својот став „не на војната“ Шпанија се наоѓа на вистинската страна на историјата и претставува „референтна точка“ за прогресивните сили ширум светот и за сите кои веруваат во мир.
„Од самиот почеток, ставот на Шпанија беше јасен – нема војна, затоа што тие зборови опфаќаат сè: сеќавање, достоинство и посветеност на нацијата“, нагласи тој, пренесува RTVE.
Санчез направи споредба со политиката на поранешниот премиер Хосе Марија Азнар за време на Војната во Ирак во 2003 година, оценувајќи дека тогашната поддршка на конфликтот ја поставила земјата „на погрешната страна на историјата“.
„Научив што се случува кога владата ќе му сврти грб на својот народ и ќе се поклони на интересите на странска сила. Кога ја презира вистината и ја става земјата на погрешната страна на историјата. Но, пред сè, научив што се случува кога народот ќе се крене со храброст и достоинство, кога милиони луѓе ќе излезат на улиците да кажат ‘не во мое име’“, истакна Санчез.
Тој додаде дека неговата влада се залага за мир кој „не е само слоган, туку уверување“.
„Тоа не е луксуз, туку неопходност“, рече тој, нагласувајќи дека кога социјалистите се на власт, тие дејствуваат во согласност со тие принципи.
Санчез потсети и на поддршката за Украина и Палестина во актуелните конфликти, истакнувајќи дека е „неопходно да се стави крај на војната“.
„Социјализмот значи да не се навикнуваш на неправдата и никогаш да не се помируваш со насилството“, заклучи шпанскиот премиер.
