Компанијата OpenAI претстави многу интересна опција која несомнено ќе ги задоволи оние кои веќе се во празничниот дух. До крајот на декември четботот ChatGPT ќе може да го имитира гласот на Дедо Мраз.
Оваа функција е достапна во Advanced Voice режим, до кој корисниците можат да пристапат со допирање на копчето десно од полето за внесување текст. Откако ќе го направат тоа, корисниците меѓу стандардните опции ќе можат да го пронајдат гласот на добро познатиот брадест маж од Северниот Пол.
Апликацијата на ChatGPT го опишува овој глас како „весел и светол“, и звучи исто како што би го замислиле Дедо Мраз да звучи – со познатото смеење „хо, хо, хо“.
Иако гласовниот режим во апликацијата ChatGPT официјално не го поддржува македонскиот јазик, тоа нема да ве спречи да го слушнете Дедо Мраз на македонски. Едноставно кажете му на кој јазик сакате да разговарате и четботот ќе се прилагоди на вашите барања.
Гласот на Дедо Мраз е достапен за сите корисници, без разлика дали ја користат апликацијата на паметен телефон или на компјутер. Иако може да биде одлично хоби за децата, имајте на ум дека OpenAI не ја препорачува новата опција за деца под 13 години.
