Персонал од Соединетите Американски Држави заплени брод во близина на брегот на Венецуела, изјави американски официјален претставник, додека администрацијата на Трамп го зголемува притисокот врз Каракас.
Ова е втор познат случај овој месец во кој САД пресретнале брод во близина на Венецуела, а сето тоа се случува откако претседателот Доналд Трамп оваа недела најави „блокада“ на санкционираните нафтени танкери кои влегуваат и излегуваат од земјата. САД на 10 декември запленија голем нафтен танкер со име Skipper, кој бил под санкции поради поврзаност со Иран, пишува CNN.
Иако директивата на Трамп оваа недела беше насочена кон санкционирани танкери, пловилото што САД го запленија во саботата не било под американски санкции, изјави официјалниот претставник. Екипажот на танкерот не ја оспорил заплената.
Според официјалниот претставник, станувало збор за танкер под панамско знаме кој превезувал венецуелска нафта, а крајната дестинација била Азија.
Саботната операција ја предводела Американската крајбрежна стража, со поддршка од американската војска, а се одвивала во меѓународни води, соопшти официјалниот претставник.
Министерката за внатрешна безбедност Кристи Ноем, чија агенција ја вклучува и Крајбрежната стража, во саботата попладне објави седумминутно видео на социјалните мрежи на кое се гледа хеликоптер како лебди над танкерот. Таа напиша дека танкерот бил фатен „во акција пред зори“ од страна на Крајбрежната стража со поддршка од Министерството за одбрана и дека последен пат бил закотвен во Венецуела.
„Соединетите Американски Држави ќе продолжат да се борат против нелегалното движење на санкционирана нафта која се користи за финансирање на нарко-тероризмот во регионот“, изјави таа.
Во меѓувреме, министерот за надворешни работи на Венецуела во саботата објави дека Иран понудил соработка во спротивставувањето на она што го опиша како „акти на пиратство“ и „меѓународен тероризам“ од страна на американската влада.
Министерот за надворешни работи Иван Гил на Телеграм изјави дека телефонски разговарал со својот ирански колега Абас Арагчи за да ги разгледаат билатералните односи и да разговараат за „неодамнешните случувања на Карибите, особено заканите“ и „кражбата на бродови натоварени со венецуелска нафта“.
Гил рече дека Техеран изразил „целосна солидарност“ со Венецуела и понудил соработка „во сите области“ за да се спротивстави на американските акции, за кои рече дека го кршат меѓународното право.
Во комбинација со заканите на Трамп за копнени напади на територијата на Венецуела, заплените на бродови го зголемија притисокот врз Каракас, удирајќи по економската жила куцавица на земјата, која и онака е под притисок поради новите санкции врз нафтениот сектор воведени порано оваа година.
САД веќе со месеци вршат притисок врз Венецуела, што вклучува преместување на илјадници војници и ударни групи со носачи на авиони во Карибите, напади врз сомнителни бродови со дрога и повторени закани кон претседателот Николас Мадуро.
Американската војска уби 104 лица во напади во кои беа уништени 29 наводни бродови со дрога, напади кои администрацијата на Трамп ги претстави како обид за сузбивање на нелегалните текови на дрога и мигранти од Венецуела. Но, овие постапки исто така укажаа на сеопфатна кампања на притисок врз Мадуро – чие соборување, според шефицата на кабинетот на Белата куќа Сузи Вајлс, е вистинската цел на администрацијата.
Најавата на Трамп за „блокада“ оваа недела дополнително го нагласи фокусот на претседателот врз нафтата на земјата, за која тој рече дека САД треба да имаат пристап доколку Мадуро биде соборен. Државната компанија Petróleos de Venezuela ја контролира нафтената индустрија во земјата. Компанијата Chevron со седиште во Хјустон е единствената американска фирма која врши бушење во Венецуела и плаќа процент од своето производство на PDVSA во рамки на исклучок од санкциите.
Венецуелските резерви на нафта се најголеми во светот, но се значително под капацитет поради меѓународните санкции. Голем дел од нафтата на таа земја се продава на Кина.
Венецуела претходно оваа недела остро ја критикуваше блокадата, нарекувајќи ја „неодговорна и сериозна закана“. Таа соопшти дека ќе продолжи да го брани својот суверенитет и националните интереси.
Потпретседателката на Венецуела, Делси Родригез, во саботата изјави дека земјата „ја осудува кражбата и киднапирањето на нов приватен брод кој превезува венецуелска нафта“ и дека ќе „преземе сите соодветни мерки, вклучително и информирање на Советот за безбедност на Обединетите нации, другите мултилатерални организации и владите ширум светот“.
