Американскиот државен секретар Марко Рубио не ги именуваше лицата за кои рече дека ја прекршиле новата визна политика објавена во мај, со која се ограничува влезот на странци што се сметаат за одговорни за цензура на заштитениот говор во САД. Тој ги опиша само како „радикални“ активисти и невладини организации „претворени во оружје“.
„Предолго идеолози во Европа водеа организирани напори да ги присилат американските платформи да ги казнуваат ставовите на Американците со кои не се согласуваат“, напиша Рубио на платформата X.
„Администрацијата на Трамп повеќе нема да ги толерира овие одвратни чинови на екстериторијална цензура“, додаде тој.
Подоцна, петтемина Европејци ги идентификуваше Сара Роџерс, потсекретарка за јавна дипломатија, преку серија објави на социјалните мрежи. Меѓу нив се поранешен комесар на Европската унија и лидери на организации што се борат против таканаречената „дигитална омраза“.
Во изјавата на Рубио се наведува дека тие развивале кампањи на странски влади насочени кон цензура против Американци и американски компании, што, како што рече, создало „потенцијално сериозни негативни надворешнополитички последици“ за САД.
Забраната за влез е дел од кампањата на администрацијата на Доналд Трамп против странско влијание врз онлајн говорот, при што се користи Законот за имиграција, наместо регулативи за платформите или санкции.
Лицата наведени од Роџерс се: Имран Ахмед, извршен директор на Центарот за сузбивање дигитална омраза; Жозефин Балон и Ана-Лена фон Ходенберг, лидерки на германската организација HateAid; поранешниот комесар на ЕУ Тјери Бретон, задолжен за дигитални прашања; како и Клер Мелфорд, директорка на Глобалниот индекс на дезинформации.
Според Законот за имиграција и државјанство, на лицата опфатени со мерката по правило ќе им биде забранет влез во САД, а некои би можеле да се соочат и со постапка за депортација доколку веќе се наоѓаат во земјата. Американски официјални лица наведоа дека листата може да се прошири доколку продолжат слични странски активности.
Иако мнозинството Европејци се опфатени со Програмата за укинување визи, тие сепак мора да поднесат онлајн пријава пред патување преку системот на Министерството за внатрешна безбедност, што значи дека барем дел од овие пет лица веројатно биле евидентирани од американските власти.
Француските власти остро ја осудија американската одлука за забрана за влез во САД на поранешниот европски комесар Тјери Бретон и уште четворица европски функционери.
„Франција силно ги осудува визските ограничувања што САД ги воведоа кон Тјери Бретон, поранешен министер и европски комесар, како и кон уште четири европски личности“, напиша на платформата X шефот на француската дипломатија Жан-Ноел Баро.
„Народите на Европа се слободни и суверени и не можат да дозволат други да им наметнуваат правила што се применуваат во нивниот дигитален простор“, додаде Баро, пренесоа француските медиуми.
Извор: N1info.rs
