Кина повторно ги престигна САД како најголем трговски партнер на Германија во првите осум месеци од 2025 година, враќајќи се на првото место откако повисоките царини влијаеја врз германскиот извоз во САД, покажаа прелиминарните податоци од германската статистичка служба.
Според проценките на Ројтерс, германската трговија со Кина од јануари до август изнесувала 163,4 милијарди евра, а со САД 162,8 милијарди.
Ситуацијата се промени со враќањето на Трамп во Белата куќа.
Со тоа што станаа најголем трговски партнер на Германија во 2024 година, САД ја завршија осумгодишната доминација на Кина. Промената дојде откако Германија се обиде да ја намали својата зависност од Кина, при што Берлин ги наведе политичките разлики и го обвини Пекинг за нефер трговски практики.
Сепак, со враќањето на Доналд Трамп во Белата куќа и повторното воведување на царини, ситуацијата повторно се промени.
Царините го намалија германскиот извоз во САД, кој се намали за 7,4 проценти во првите осум месеци од оваа година во споредба со 2024 година, на 99,6 милијарди евра. Во август, извозот во САД се намали за 23,5 проценти на годишно ниво, што покажува дека овој тренд се забрзува.
Германскиот извоз во Кина падна уште повеќе од извозот во САД
„Нема сомнение дека царинските и трговските политики на САД се важна причина за падот на продажбата“, рече Дирк Јандура, претседател на германското здружение за надворешна трговија BGA. Тој истакна дека побарувачката на САД за класични германски извозни стоки, како што се автомобили, машини и хемикалии, е намалена.
„Со моменталната закана од царини и зајакнување на еврото, германскиот извоз во САД веројатно нема да закрепне во скоро време“, рече Карстен Брзески, шеф на одделот за макроекономија на ING.
Извозот во Кина падна уште посилно од извозот во САД, намалувајќи се за 13,5 проценти на годишно ниво на 54,7 милијарди евра во првите осум месеци од 2025 година. Спротивно на тоа, увозот од Кина се зголеми за 8,3 проценти на 108,8 милијарди евра.
„Обновеното зголемување на увозот од Кина е загрижувачко, особено затоа што податоците покажуваат дека увозот доаѓа по дампинг цени“, истакна Брзески, предупредувајќи дека ова ја зголемува зависноста на Германија од Кина, а може да влијае и на тензиите во клучните индустрии каде што Кина стана главен ривал.
