Американското Централно командување (CENTCOM) ги предупреди цивилите во Иран веднаш да се оддалечат од сите пристанишни објекти во Ормускиот Теснец што ги користи иранската морнарица.
Во соопштението се наведува дека иранските власти користат цивилни пристаништа за воени операции кои претставуваат закана за меѓународниот поморски сообраќај.
Според CENTCOM, ваквата практика ги доведува цивилите во опасност, бидејќи објектите што се користат за воени цели според меѓународното право го губат статусот на заштитени цивилни објекти и можат да станат легитимни воени цели.
„Иранските поморски сили распоредија воени бродови и опрема во цивилни пристаништа низ кои минува комерцијалниот поморски сообраќај“, се наведува во соопштението.
Американската војска ги повика пристанишните работници, административниот персонал и екипажите на трговските бродови да се држат подалеку од иранските воени бродови и воена опрема.
CENTCOM додава дека американските сили не можат да ја гарантираат безбедноста на цивилите во или во близина на објектите што иранските власти ги користат за воени цели, но нагласува дека ќе преземат мерки за да го намалат ризикот за цивилното население.
