Соединетите Американски Држави ќе ослободат 172 милиони барели нафта од своите стратешки резерви во обид да ги намалат цените на нафтата, кои нагло пораснаа поради нарушувањата во снабдувањето предизвикани од војната меѓу САД, Израел и Иран.
Американскиот министер за енергетика Крис Рајт изјави дека оваа мерка е дел од пошироко ослободување на 400 милиони барели нафта, за кое претходно се договорија земјите членки на Меѓународната агенција за енергија.
Тој додаде дека ослободувањето на нафтата ќе започне следната недела, а испораките ќе траат околу 120 дена.
„Претседателот Доналд Трамп вети дека ќе ја заштити енергетската безбедност на САД преку одговорно управување со стратешките нафтени резерви, а оваа мерка ја покажува неговата посветеност на тоа ветување“, изјави министерот.
Од Меѓународната агенција за енергија соопштија дека 32 земји членки ја поддржале одлуката, која претставува шесто координирано ослободување на нафтени резерви од основањето на агенцијата во 1970-тите години.
Овој потег има цел да го ублажи притисокот врз глобалниот пазар на енергенси, кој се соочува со сериозни нарушувања поради конфликтот на Блискиот Исток.
Од почетокот на војната значително е отежната пловидбата низ Ормускиот теснец, еден од најважните морски премини во светот, низ кој обично се транспортира околу една петтина од глобалната нафта и течниот природен гас.
Иран во средата предупреди дека светот треба да се подготви за цена на нафтата од дури 200 долари по барел, додека неговите сили продолжуваат со напади врз трговски бродови во Ормускиот теснец.
