Соединетите Американски Држави ќе им отстапат две исклучително високи командни функции во НАТО на европски офицери – во Наполи (Италија) и Норфолк, Вирџинија, изјави воен извор за Reuters.
Одлуката е во согласност со барањата на американскиот претседател Доналд Трамп, кој подолго време инсистира европските земји да преземат поголема одговорност за сопствената безбедност. Неговата администрација настојува НАТО, сојуз кој со децении беше доминиран од САД, да се трансформира во „НАТО предводен од Европа“.
Во рамки на реорганизацијата на командната структура, европски офицери ќе го преземат Командното седиште на здружените сојузнички сили во Наполи и Командата на здружените сили во Норфолк, со кои досега раководеа американски адмирали. Изворот нагласи дека САД, пак, ќе преземат три командни позиции пониски во хиерархијата.
НАТО ги потврдува промените
Прашан за најавените промени, претставник на НАТО изјави дека сојузниците постигнале договор за нова распределба на одговорностите меѓу високите офицери, при што европските земји – вклучително и најновите членки на Алијансата – ќе имаат поистакната улога во военото раководство.
Американскиот амбасадор во НАТО, Метју Витакер, претходно ги отфрли критиките кон Вашингтон, нагласувајќи дека САД „не се обидуваат да го распуштат НАТО“, пренесе AFP.
„Нашата цел е да го зајакнеме НАТО, а не да се повлечеме од него или да го отфрлиме. Сакаме Алијансата да функционира онака како што е замислена – како сојуз на 32 силни и способни сојузници“, додаде Витакер.
