Администрацијата на американскиот претседател Доналд Трамп, донесе одлука со која се укинуваат санкциите против сирискиот претседател Ахмад ал Шара.
Ден претходно истото го направија Велика Британија и Советот за безбедност на ОН, во пресрет на неговата средба со американскиот претседател Доналд Трамп следната недела.
Според објавата на веб-страницата на американското Министерство за финансии, санкциите се укинати и за сирискиот министер за внатрешни работи Анас Хатаб, а двајцата се избришани од листата на „специјално означени глобални терористи“, пренесува „Ројтерс“.
Шара, порано познат како Абу Мохамед ал-Џулани, стана претседател на Сирија во јануари откако бунтовничките сили предводени од групата Хајат Тахрир ал-Шам (ХТС) го соборија Башар ал-Асад во молскавична офанзива.
Шара, кој некогаш беше висок функционер во ХТС и претходно поврзан со Ал Каеда, беше под санкции на ОН од 2014 година, вклучувајќи забрана за патување, замрзнување на средства и ембарго за оружје.
