Според The Guardian, членовите искористиле значително повеќе погодности отколку што компанијата заработила од нивните членарини.
Во Prime се зачлениле околу 55.000 патници, со што авиокомпанијата инкасирала околу 4,4 милиони евра. Но, вредноста на дадените попусти – како намалени цени на летови и бесплатни резервирања на седишта – надминала 6 милиони евра, што довело до нето загуба за Ryanair.
Маркетинг-директорот Дара Брејди потврди дека моделот бил неодржлив:
„Овој пробен програм чинеше повеќе отколку што генерираше. Овој обем на членство не го оправдува трудот и времето потребни за месечни ексклузивни распродажби за 55.000 Prime корисници“, изјави тој.
Програмот беше лансиран во февруари со годишна членарина од 79 евра, нудејќи попусти на летови, до 12 бесплатни резервации на седишта годишно и патничко осигурување. Со оглед на тоа што цените на седиштата се движат од 4,50 до 38 евра, најактивните корисници успевале да остварат значителни заштеди.
Од денес, нови членства не се дозволени. Сегашните корисници ќе можат да ги користат сите придобивки до истекот на нивната 12-месечна претплата. Од компанијата порачуваат дека ќе се вратат на досегашната практика – попусти достапни за сите патници, а не само за избран клуб.
Ryanair, кој годишно превезува повеќе од 207 милиони патници, е познат по ниските основни цени на билетите, а профит најмногу остварува преку дополнителни услуги: наплата за предаден багаж, избор на седиште, пријава на аеродром и други такси.
Компанијата уште во 2006 година ја воведе наплатата за предаден багаж, а во 2009 и такси за пријава на лет на аеродром – во време кога многу патници сè уште не користеа паметни телефони за да ги преземат картите.
Оваа година Ryanair ги зголеми бонусите за авио-персоналот за секоја рачна торба што ги надминува пропишаните димензии, при што патниците плаќаат до 75 евра за пренесување на багажот во багажниот отсек.
Извор: Index.hr
