Генералниот секретар на НАТО, Марк Руте, изјави дека западните армии не можат да продолжат да ги соборуваат дроновите со скапи ракети, додавајќи дека Алијансата брзо учи од искуството на Украина во справување со руските дронови.
„Не е одржливо да соборувате дронови кои чинат 1.000 или 2.000 долари со ракети кои чинат половина милион или дури еден милион долари. Сите ние брзо развиваме технологии и учиме од Украинците“, изјави Руте за Блумберг.
Тој ги нарече недамнешните упади на дронови во Данска „многу загрижувачки“.
Трамп и НАТО – позитивно влијание
Руте исто така изјави дека претседателот на САД, Доналд Трамп, бил корисен за НАТО, бидејќи неговиот притисок врз членките да ја зголемат воената потрошувачка дал позитивни резултати:
„Секогаш сум верувал во НАТО, но мислам дека доаѓањето на Трамп навистина помогна“, изјави Руте.
Одговор на изјавите од Кремљ
Руте се осврна и на изјавата на портпаролот на Кремљ, Дмитриј Песков, кој на коментарите на Трамп дека Русија е „хартиен тигар“ одговори дека Русија е „мече“. Руте смета дека такви изјави покажуваат слабост од страна на Москва:
„Ако не си хартиен тигар туку мечка – нема потреба тоа да го кажуваш. Сите ќе го видат тоа. Ваквите изговори ја покажуваат слабоста на Русија.“
Руте додаде:
„Да сум јас рускиот претседател Владимир Путин, и да ме интересира историјата на мојата земја, ќе ми биде непријатно.“
Алијансата, според Руте, е фокусирана на развој на поефикасни и поекономични начини за справување со заканата од евтини, но се поприсутни дронови кои можат да предизвикаат сериозни безбедносни предизвици, особено во светло на последните инциденти во европскиот воздушен простор.
