Руските специјални сили влегоа во украинскиот град Суџа во неделата, користејќи гасовод за да изненадат украинските единици, пишуваат проруски воени блогери, а пренесува Ројтерс.
Овој маневар е дел од пошироката руска офанзива со цел да ги потисне украинските сили од западниот дел на регионот Курск.
Украинските сили зазедоа околу 1.300 квадратни километри од Курск во август минатата година, што Киев го оправда како стратешки потег за добивање предност во идните преговори и принудување на Русија да прераспредели сили од источна Украина.
Според проруските извори, руските специјални сили се движеле околу 15 километри низ внатрешноста на главниот гасовод, а некои војници поминале денови во цевката пред да ги нападнат украинските единици од задниот дел на Суџа.
Суџа е значајна локација поради нејзините големи гасни станици, кои во минатото биле дел од инфраструктурата за пренос на руски гас кон Европа.
Проруските воени блогери објавија снимки на кои се гледаат специјални сили со гас-маски во внатрешноста на голем гасовод. Според нив, во градот се водат жестоки борби, при што руските сили напредуваат во североисточниот дел на Суџа, особено во индустриската зона и околу улицата Ломоносов.
Во последните недели, руските сили ја зајакнаа својата позиција на Курскиот фронт, со цел да ја опколат украинската војска во регионот.
