Потпретседателот на рускиот државен нафтен концерн „Транснефт“, Андреј Бадалов, починал утрово во Москва, објави денес руската новинска агенција ТАСС.
Телото на Бадалов (62) е пронајдено под прозорецот на неговата вила во луксузната населба Рубљовка, објави агенцијата, повикувајќи се на полициски извори.
Судски извори за ТАСС изјавија дека прелиминарната причина за смртта се смета за самоубиство и дека истрагата се движи во таа насока.
Бадалов е потпретседател на Транснефт од 2021 година и во тој капацитет беше задолжен за дигитализацијата на компанијата. Пред тоа, според агенциите, тој работел во индустријата за оружје и во институт кој, меѓу другото, бил задолжен за дигитализација на руските избори.
Според судски извори, Бадалов оставил зад себе проштално писмо.
Во последните години, во Русија имало неколку случаи на високи функционери и нивните семејства кои починале под необични околности, а меѓу нив имало и неколку високи раководители во енергетскиот сектор. Така, претседателот на одборот на директори на Лукоил, Равил Маганов, паднал од прозорецот на Централната клиничка болница во Москва.
Два понови случаи беа смртта оваа година на раководителот на филијалата на руската антимонополска служба во Република Карелија, полковник Артур Прјахин, и раководителот на Форензичкиот центар на Рускиот истражен комитет, полковник Алексеј Зубков, кои двајцата починаа откако паднаа од прозорец.
Во сите случаи, истрагата претпостави дека станува збор за самоубиство.
